عزيزى الممول عشان تاخد اعفاء تعمل اية

شوف يا سيدى عشان تجهز نفسك وتحضر ورقك وانت رايح اى مامورية ضرايب عقارية بعد ما يجيلك الاخطار
1- اوعى تتخض او تنطرب الموضوع بسيط خالص اسهل من شكة الدبوس

2- لو انت عندك بيت واحد من شقة واحدة باسمك هتاخد البطاقة والاخطار وتروح لمامورية الضرايب اللى انت تابع ليها وتقدم طلب الاعفاء ومبروك عليك

3- طب البيت لو فية اكتر من شقة بسيطة بردة هتاخد بطاقتك ويطاقة اولادك معاك بس بص يا حلو لازم ولادك يكونوا معديين 21 سنة او متجوزين دون السن وتكتب اقرار على نفسك ان الشقق دى قاعد فيها عيالك وعايز افهمك ان انت والزوجة والاولاد القصر ليكو شقة واحدة

4-طب ياسيدى لو انا قاعد فى شقة واحدة وباقى الشقق مش جاهز للسكن يعنى لسة متشطبتش او مفيهاش مرافق او لسة عالطوب والمحارة بس بشرط متكونش مشغولة يعنى مش مسكونة يعنى مفيش حد قاعد فيها بسيطة هنعملك اعفاء لشقتك وباقى الشقق نعملك بيها شكوى وتاخد اعفاء

5- فتح دماغك بقى طب لو عندك بيت فلاحى يعنى بالطوب اللبن النى يعنى او بالطوب الاحمر والخشب ومكون من دورين متزعلش يا سيدى دة بقى البيت الريفى بيتعامل كوحدة واحدة اوشقة واحدة وبياخد اعفى مبروك عليك

6- طب لو انت عندك شقتين فوق بعض وسيادتك عامل ليهم سلم داخلى يعنى السلم جوة الشقة بيطلعك عالتانية على طول زى نظام الفلات كدة افرحك واقولك ان دول بنعتبرهم شقة واحد بسلم داخلى وتاخد عليهم اعفاء على انهم شقة واحدة

7-صحصح احنا قولنا فى الاول لو البيت باسمك يبقى ببطاقتك وبطاقة الاولاد وممكن بردة والدك او والدتك تقعدهم فى شقة وتاخد عليها اعفاء محدش بقى يجيب البطاقة بتاعة اخوة ولا اختة الا لو كان فية عقد بيع منك او قسمة واختصاص بينكم ومتزعلش اوى العقد او القسمة مش شرط تكون متسجلة يعنى ممكن تكون عرفية يعنى تعملها وانت قاعد على المسطبة وبعد كدة تقطعها عادى

8-طب يا معلم لو البيت كان باسم والدك وهو توفى معلش كلنا هنموت يبقى لازم تجيب شهادة الوفاة عشان نعمل الاعفاء باسمك لو كنت وحيد وتجيب معاك اعلام وراثة لو كنتم كتير وصور البطايق للقاعدين معاك عادى طب لو مفيش اعلام وراثة يبقى شهادة الوفاة بس بص لو والدتك قاعدة معاك يبقى تجيب شهادة ميلاد ليك عشان نعرف انها والدتك عشان معظم البطايق بتاعة زوجة المتوفى بيكون مكتوب فيها ارملة وشهادة الميلاد هية اللى هتثبت انها والدتك

9-معلش انا نفسى دماغى لفت بس معاك واحدة واحدة لحد مفهمك واريحك واخليك جاى مبسوط واروحك بردو مبسوط

10-الحتة دى مهمة نفرض ان انت قاعد فى المنوفية وبيتك اللى جالك عنة الاخطار فى المنوفية اللى انت هتقدم علية الاعفاء يعنى بس بطاقتك يا جميل مكتوب فيها محل اقامة تانى يعنى القاهرة مثلا اااااااااااه متقلقش تتفضل سعادتك وتجيب لينا صوره عقد ايجار لو انت قاعد فى القاهرة بالايجار طب انت بتقول انك مش قاعد اصلا فى القاهرة طب انا اعرف منين يمكن يكون ليك شقة هناك ملكك وعايز تتهرب سهلة هات وصل مرافق للبيت بتاع المنوفية يعنى وصل مية اوكهرباء او فاتورة تليفون باسمك او اى حاجة تثبت انك قاعد فى البيت دة

11- طب يا عم انا فلاح وجالى اخطار للزريبة بتاعتى اللى هية حظيرة مواشى يعنى ماشى يا عم الفلاح هات معاك صورة بطاقة الحيازة الزراعية اوبيان من الجمعية الزراعية بيقول ان دى حظيرة مواشى عشان نعفيهالك

12-هتقل عليك انا عندى جراج بحط فية العربية او الموتسيكل بتاعى ماشى هات معاك صورة رخصة العربية او الموتسيكل عشان نعملة جراج مخصوص لحضرتك ومتدفعش علية ضريبة بس لازم تكون العربية ملاكى مش نقل او اجرة

13-نيجى بقى للمهم اللى هوة اتحصر تجارى وجالك علية اخطار زى المحلات والورش والسكن الادارى اللى انت ماجرة ومزارع الدواجن والمخازن والارض اللى انت عامل فيها منحل عسل او معرض سيراميك او وكالة اوملعب كرة من بتوع اليومين دول يعنى اى عقار عندك بيدخلك فلوس هتدفع هتدفع

14- ماشى يا عم بس انا شايف ان فية مغالاة فى الضريبة للورشة او المزرعة الخ الخ الخ حاضر اتفضل حضرتك واعمل طعن على القيمة الايجارية بيقول ان الضريبة دى كتير بس لازم تدفع 50 جنية رسوم طعن والضريبة كمان وان كان كلامك صحيح هتاخد ال50 جنية تانى ونقللك الضريبة لان فى الحالة دى هتنزل معاينة على الطبيعة وتشوف كلامك صح ولا لا

15- طيب الارض الفضاء انا كنت عامل فيها معرض او وكالة او ملعب الخ الخ الخ ودلوقتى رجعت فاضية تانى اعمل اية فى الحالة دى بتقدم طلب اسمة رفع الضريبة وبتدفع 50 جنية + سنة ونص من الضريبة عشان نشيل الضريبة دى

16- بص بقى انا عملت اللى علية وعايز انصحك قدم بيانات صح واوعى تكدب عشان كل دة تحت مسئوليتك واقرار منك وتقديم اى بيانات مش سليمة اوغير صحيحة عشان تتهرب من الضريبة بيعرضك للحبس والغرامة من 2000-5000 الاف جنية

اية رايك بقى يا عم كل شىء واضح دلوقتى بالنسبة ليك خد بقى كل الاوراق معاك عشان مترجعش وتتمشور تانى وسن قلمك وتوكل على الله

وتحيا مصر

مع تحياتى سعيد صلاح الشريف

لجنة الاستفسارات وتلقى الطعون

مامورية شبين الكوم مال

مديرية الضرائب العقارية بالمنوفية

اللائحة التنفيذية ممكن يكون فيها كلام جديد